بعد مرور أكتر من سنة تقريبا بس مش عارف سنة وكام شهر بظبط
المهم إنى قررت إنى أعمل عيد ميلاد للمدونة دى بس طبعا مش هيبقى زى أى عيد ميلاد
أنا هتكلم عن المدونة شوية فى الأول علشان المدونة دى ليها فضل كبير عليا أوى
فى إنى بكتب فيها الكلام اللى مكنتش بقدر أكتبة زمان
يمكن كنت بكتب كلام على ورق بس كانت نهايتة فى الزبالة
ولما قررت أدخل عالم التدوين فى البداية عملت مدونة إسمها تخاريف حريف
كنت بنقل فيها مواضيع من منتديات أو من مواقع بس طبعا مكنتش بنقل أى كلام وخلاص
كنت بنقل حاجات ليها معنى وأهداف
بس بعد كدة فكرت فى الكلام اللى كنت بكتبة على ورق وبيترمى فى الزبالة
وقررت إنى أكتب هنا فى المدونة كل اللى أنا حاسس بية واللى أنا شايفة صح أو من وجهة نظرى صح
فى ناس كتير قالتلى إنى كلامى كويس ويمكن فى ناس إنتقدت كلامى
كنت بفرح أوى لما الناس تقولى كلامك كويس بس كنت بفرح أكتر لما حد بينتقدنى
عارفين لية ؟؟؟
هو دة موضوع إنهردة اللى حبيت أكتبة فى عيد ميلاد مدونتى
عيشها بشكل تالت دة إسم المدونة اللى إختارتة من زمان واللى إن شاء الله مش هغيرة
بعد ماعملت مدونة تانية إسمها أحلام واقعية
عيشها بشكل تالت مدونة رومانسية بتكلم فيها عن المشاكل العاطفية
والمواضيع الرومانسية من وجهة نظرى الشخصية
كتير من الناس مستغربة من الإسم وفى كمان اللى بيتريق على الإسم
فى ناس قالت هو إحنا عيشناها بالشكل التانى علشان نعيشها بالشكل التالت
أنا شخصيا مش بقولك عيشها بالشكل التانى ولا التالت أنا بقول عيشها زى مانت شايفها
فى ناس قالتلى مايمكن أنا شايفها غلط
جاوبت وقلتلة بظبط كدة إنت رديت على نفسك ومش محتاج إنى أجاوب عليك
عيشها زى مانت شايفها بس المهم تكون شايفها صح
وكمان كنت عملت توبيك إسمة عيشها زى مانت شايفها موجود فى مدونة أحلام واقعية
وبإختصار كتبت فى الحياة زى مانا شايفة من وجهة نظرى
الحياة زى مانا شايفها
واسعة جدا بس ديقة أوى
كبيرة جدا بس صغيرة أوى
وحشة أوى بس حلوة للى يفهمها
الحياة
أشكال وألوان
أبيض وإسود وبمبى كمان
غنى وفقير وطيب وغلبان
لحد دلوقتى مجاوبتش على سؤال
لية أنا بفرح أوى لما حد بينتقدنى أكتر من فرحتى لما حد بيقولى إنت كويس ؟؟
الكدب والمجاملة وعلشان أنا مش دايما صح ومش أنا لوحدى اللى مش صح كلنا بنغلط ؟
دول 3 حاجات لازم أتكلم عنهم بس مش هتكلم عنهم إنهردة لكن إن شاء الله قريب أوى هتشوفوا التوبيك دة
أتمنى إن المدونة تكون عجباكم وإن الكلام اللى بقولة فيها ميبقاش مجرد كلام وخلاص وإننا نستفيد منها
وأتمنى كمان إن المدونة الجديدة تكون عجباكم واللى ميعرفش اللينك بتاعها هو دة
www.a7med-7amdy.blogspot.com